Landnámið

Leikmunir og hikmynd
Nemendur fjalla um ferð landnámsmanna frá Noregi til Íslands. Þeir vinna í hópum og býr hver hópur til víkingaskip, persónur og dýr sem ferðast með skipinu til Íslands. Til að nýta og læra á upplýsingatækni í þessum söguramma mætti gera hikmynd (e. stopmotion) með skipum, persónum og leikmunum sem nemendur hafa skapað. Unnið er í þriggja til fimm manna hópum. Hér má sjá sýnishorn af mynd eftir nemendur í 5. bekk Kársnesskóla haustið 2014.

Tökubúnaður og samsetning
Hægt er að gera hikmyndir í ýmsum forritum. Símar og spjaldtölvur henta vel í þá vinnu og til er fjöldinn allur af smáforritum sem nýta má við hikmyndagerðina. Hér er miðað við að nemendur noti vefmyndavél frá HUE og forritið HUE Animation við hikmyndagerðina. Á síðunni Fyrir nemendur er að finna verkefnalýsingu og kennslumyndir um forritið.

Sviðsmyndir og leikmunir í pappakassa
Til að auðvelda utanumhald og flutning á leikmunum er gott að finna til stóra pappakassa og þá má líka nota til að útbúa bakgrunna og stilla upp sviðsmyndum. Nemendur byrja á að útbúa þrjá bakgrunna til að hafa í myndinni og gæta þess að þeir falli vel inn í pappakassann. Ein sviðsmyndin má vera frá Noregi, önnur frá ferðalaginu til Íslands og sú þriðja frá Íslandi. Hægt er að mála bakgrunnana, teikna og lita, útbúa klippimyndir eða klæða grunna með ýmsu efni. Svo þarf að útbúa fólk, dýr og muni sem eiga að koma fyrir í myndinni. Ef ekki á að nota verur og muni sem nemendur útbúa sjálfir má styðjast við Playmo-dót í myndinni. 

Sýnikennsla um tökur
Hér að neðan má sjá örstutta mynd sem gott er að sýna eða skoða áður en byrjað er á verkefninu. Myndin sýnir vinnuferlið við hikmyndagerð með myndavél og forriti frá HUE. Bleikri myndavélinni er stillt þannig upp að hún nái góðri mynd af leikmununum í kassanum. 

Heim

Fyrir nemendur

Söguborð
Áður en nemendur byrja á myndinni þurfa þeir að útbúa söguborð (e. storyboard). Á vefsetri Námsgagnastofnunnar er að finna undir yfirskriftinni Margmiðlun - stafræn miðlun stuttar kennslumyndir Björgvins Ívars Guðbrandssonar kennara við Langholtsskóla og þær er líka gott að skoða áður en byrjað er á vinnunni. Í tengslum við þetta verkefni má sérstaklega nefna myndirnar Söguborð og Stop Motion. 

Hér er rammi að söguborði (e. storyboard template) sem hægt er að láta nemendur fá að styðjast við. Einnig má leita á netinu með leitarorðunum storyboard template og þá koma upp óteljandi möguleikar og útfærslur á söguborðum.