Aldasafnið

Sögurammi um merka atburði í aldanna rás
Nemendur fjalla um ýmsa merkisatburði í Íslandssögurnni sem gerðust á fjórtándu, fimmtándu, sextándu, sautjándu og átjándu öld. Nemendur vinna ýmist einir eða í hópum að ýmsum verkefnum. Upplýsingatækniverkefnið sem lagt er til í þessum söguramma felst í gerð stuttmyndar. Nemendur vinna saman í hópum að gerð myndarinnar.

Stuttmyndagerð og búnaður í skólum
Hægt er að  taka upp myndskeið með búnaði eins og símum, spjaldtölvum, myndavélum og tökuvélum og setja saman eða klippa í ótal forritum. Hér er ekki tekið mið af einu forriti umfram önnur. Margir skólar eru komnir með spjaldtölvur og eru þær að flestu leyti mjög góðar til að taka upp og vinna stuttmyndir. Einnig eiga margir nemendur góða snjallsíma sem hægt er að nýta við upptökurnar. Margir skólar eiga líka öflugar myndavélar eða sérstakar upptökuvélar til að nýta við myndatökur. Tölvuver eru í flestum ef ekki öllum skólum og þar ætti að vera hægt að klippa myndina og vinna eftirvinnuna. 

Kennslumyndir og leiðbeiningar
Fyrir þá kennara sem ekki hafa unnið að stuttmyndagerð eru kennslumyndir og leiðbeiningar Björgvins Ívars Guðbrandssonar kennara við Langholtsskóla á vef Námsgagnastofnunar mjög góðar. Gott er að skoða þær vel áður en farið er af stað með nemendum í stuttmyndavinnu. Ef um er að ræða fyrstu stuttmyndina sem nemendur eru að  vinna ætti kennarinn að velja nokkur atriði sem hann vill leggja áherslu á og láta nemendur horfa á viðkomandi myndbrot áður en byrjað er á vinnunni. Gott er til dæmis að leggja áherslu á handritsgerð, söguborð og þriðjungaregluna til að byrja með og bæta svo smátt og smátt við. Þarna er bæði að finna kennsluleiðbeiningar og stuttar kennslumyndir fyrir kennara og nemendur. Hér má fara beint inn á þetta efni um stafræna miðlun á vef Námsgagnastofnunar. 
Snið fyrir söguborð
Hér er rammi að söguborði (e. storyboard template) sem hægt er að láta nemendur fá áður en þeir byrja á stuttmyndagerðinni. Einnig er hægt að leita á netinu eftir leitarorðunum storyboard template og þá koma upp óteljandi möguleikar og útfærslur á söguborðum.